“Lëviz për kopshtin tim”, nisin forumet me prindërit e kopshteve të Tiranës

Elena Beta

Projekti “Rrjeti – Lëviz për kopshtin tim” i cili ka për qëllim të mobilizojë grupimet e qytetarëve për të ndikuar në rritjen drejt transparencës dhe mirëqeverisjes së pushtetin lokal, zhvilloi forumin e parë me prindërit Anëtarë të Bordeve e kopshteve të Tiranës. Prindërit të cilët morën pjesë në takim, u informuan lidhur me standated fizike dhe buxhetimin e kopshteve të Tiranës. Në takim u diskutua gjithashtu,  mbi rolin e antarëve të bordit të prindërve dhe angazhimin e tyre,  politikat lokale lidhur me arsimin parashkollor, si dhe prindërit u vunë në dijeni për trajnimin që do të zhvillohet  në hapat e tjera të projektit,  ku ata do të trajnohen për advokim dhe lobim në pushtetin lokal.

Z. Bledar Tuzi, anëtar i bordit të prindërve të kopshtit numër 31, u shpreh se për të ishte viti i parë që kishte një përgjegjësi të tillë, edhe pse prej disa vitesh është prind në kopshtin 31. Tuzi shprehu interes për të qenë pjesë e  takimeve që do të zhvillohen në kuadër të projektit  “Lëviz për kopshtin tim”, duke e parë këtë angazhim si një mënyrë për të dhënë më shumë në rolin e tij si pjesë vendimmarrëse në kopsht.

Prezente në takim ishte dhe znj. Manjola,  Kryetare e Bordit të prinderve nga kopshti numër 11, e cila ndau me prindërit e tjerë eksperiencën pozitive të vitit të kaluar të projektit, duke i nxitur ata të angazhohen për të sjellë ndryshime pozitive në sistemin shqiptar të kopshteve.

Në fund të diskutimit, pjesëmarrësit u ftuan të bëhen pjesë e platformës online “Kopshtiim.al”, e cila ka për qëllim informimin dhe përfshirjen e qytetarëve në çështjet e qeverisjes vendore dhe në veçanti të standardeve  në edukimin parashkollor.

Projekti  “Rrjeti -Lëviz për Kopshtin tim” mbështetet nga Lëviz Albania  dhe ka për qëllim të mobilizojë prindërit, opinionin publik mbi trasparencën dhe buxhetimin e kopshteve si dhe të transferojë modelin pozitiv të Tiranës në 3 qytete të tjera ( Pogradec, Sarandë dhe Delvinë).