A duhet ta përdorë fëmija telefonin?!

Në ato pak pallate me oborr që gjen në Tiranë sheh rrallë fëmijë që luajnë me top apo me lojëra të tjera. Të vegjlit ulen në një cep dhe kokë më kokë, shohin ekranin e vogël që mund te jetë telefon apo tabletë.

Një pamje tjetër që të shfaqet është ajo në kafene, ku nënat, ulën për të pirë një kafe dhe për të bërë muhabet në qetësi me mikeshat e tyre i lënë në dorë fëmijës telefonin. Kaq duhet dhe ai hesht duke u futur në lojërat gjithë ngjyra që ka ky objekt.

Por a është ky një veprim i duhur, a është shkëputur fëmija nga realiteti? A mos janë vetë prindërit ata që po i shtyjnë drejt kësaj bote?!

Shoqata Italiane e Pediatrisë Parandaluese dhe Sociale duke marr në studim këtë fenomen ka arritur në përfundimin që celularët nuk duhet t’u jepen fëmijëve nën 10 vjeç, sepse përdorimi “po transformohet gjithnjë e më shumë në një abuzim” dhe efektet e reja të valëve elektromagnetike për shëndetin “po bëhen gjithnjë e më të dukshme”. Efektet që lë përdorimi i tyre është, humbje përqendrimi, vështirësi në kuptueshmëri dhe agresivitet.

Por përkrah problemeve biologjike janë edhe ato psikologjike. “Bashkë me varësi të tjera që shoqërojnë shoqërinë tonë dhe sidomos të rinjtë, si p.sh. droga, alkooli dhe duhani, një vend të rëndësishëm ka kapur varësia nga telefoni, me dëme tepër të mëdha në zhvillimin psikik dhe shoqëror”, thotë pediatrja thotë pediatrja Maria Gracia Sapia, eksperte e ambientit dhe fëmijëve. Ndaj duhet patjetër që pediatrit, linjat e këshillimit të ndalojnë tërësisht përdorimin e telefonit për moshat nën 10 vjeç dhe të kufizojnë përdorimin e tyre në moshat e mëpasshme.