TFL ndjek ankesën e prindërve të fëmijëve të kopshtit 41: Punimet urbane, rrezik për shëndetin e fëmijëve

Elena Beta

Shoqata “Together for Life”, për të dytin vit po zbaton projektin “Lëviz për kopshtin tim” i cili mbështetet nga Leviz Albania dhe ka në fokus, monitorimin e kopshteve dhe rritjen e transparencës dhe llogaridhënies të pushtetit vendor. Në adresën zyrtare të shoqatës apo dhe në faqen e e Facebook “Lëviz për kopshtin tim”, vijnë shpesh sugjerime apo ankesa nga prindërit e fëmijëve që ndjekin arsimin parashkollor.

Ditën e sotme ka ardhur një ankesë nga komuniteti i prindërve të fëmijëve të kopshtit numër 41, të ndodhur në rrugën “Jan Kukuzeli”, Tiranë. Prindërit kanë shprehur shqetësimin e tyre lidhur me ndotjen e ajrit si pasojë e punimeve që po zhvillohen shumë pranë ambienteve mësimore të kopshtit. Në deklarimin e njërit prej prindërve thuhet se:  “Fëmijët e kopshtit 41, po përballen me një situatë të tmerrshme, kalova dhe sot e njëjta gjendje. Më e keqja është se në atë zonë punimet për rikualifimin urban do zgjasin 3 vjet, dhe ngaqë s’kanë ku t’i lenë dherat i rrasin para kopshtit. Unë shkova dje, janë të lemerisur. Kondicionerët nuk punojnë, hapin dritaret të marrin ajrin, po ndërkohë nga jashtë u hyn gjithë pluhuri brenda. Duhet reagim, jam i gatshëm ta ngrejmë zërin”.

Menjëherë pas ankesës, përfaqësues të shoqatës “Together for Life” kontaktuan me drejtuesen e kopshtit numër 41 . Drejtuesja e kopshtit megjithëse pranoi ekzistencën e kësaj problematike, pohoi se punimet po zhvillohen në të gjithë zonën urbane afër kopshtit dhe nuk cënojnë hapësirën e brendëshme të tij. Ajo na informoi se në përfundim të punimeve do të sistemohet dhe pjesa e oborrit të kopshtit. Duke patur parasysh temperaturat e larta, pluhuri dhe zhurma e punimeve ndikon në mbarëvajtjen e procesit arsimor.

Sipas nenit 28 të ligjit Nr. 69/2012 PËR SISTEMIN ARSIMOR PARAUNIVERSITAR NË REPUBLIKËN E SHQIPËRISË, njësia bazë e qeverisjes vendore (Bashkia) ka për detyrë:  Të ruajë dhe mirëmbajë  institucionin arsimor publik; ç) të garantojë kushtet higjieno-sanitare e atyre të ngrohjes në godinat e institucioneve arsimore publike.

Shoqata “Together for Life” angazhohet të ndjekë rastin në fjalë, duke e adresuar këtë problematikë pranë Bashkisë Tiranë, me qëllim zhvillimin e punimeve duke mos cenuar zhvillimin e procesit arsimor dhe edukativ në kopshtin numër 41.