Fëmijët me sjellje problematike kanë nevojë për “ndihmë” e jo për “ndëshkim”

Metodat preventive janë forma efektive reduktimin e dhunës ndaj dhe ndërmjet fëmijëve, por edhe për krijimin e sjellje pozitive për mësim. Sidoqoftë, preventiva vetvetiu nuk mund ta zhduk sjelljen e dhunshme ndërmjet fëmijëve. Disa fëmijë kanë nevojë për mbështetje intensive për t’i zvogëluar sjelljet e tyre me rrezik të lartë.

Me rëndësi kyçe është të theksohet se “ndëshkimi nuk është përgjigje adekuate ndaj sjelljes së tillë”. Fëmijët kanë nevojë që ndokush “t’u ndihmojë”, të merret me çështjen e tyre dhe t’i përmirësojë gabimet e bëra. Po ashtu prindërit mund të kenë nevojë për ndihmë nga profesionistë.

Këtu janë dhënë disa këshilla, të cilat shpresojmë se do t’u ndihmojnë:

Kur fëmija juaj përfshihet në një incident, gjithnjë merreni situatën me seriozitet dhe angazhohuni maksimalisht që t’i kuptoni të gjitha versionet rreth ngjarjes.

Kini kujdes që fëmija juaj ta kuptojë dëmin ose lëndimin që e ka shkaktuar si rezultat i sjelljes së tij.
Ndihmoni fëmijës suaj të ofrojë një zgjidhje për ta përmirësuar dhe kompensuar dëmin ose vuajtjen dhe dhimbjen e shkaktuar. Pra, ndihmoni ta përmirësojë gabimin e bërë.

Shpeshherë fëmijët me probleme serioze të sjelljes gjatë jetës së mëtejme mund të përfshihen në probleme më të mëdha. Ju si prind duhet t’u ndihmoni të futen në binarë të shëndoshë. Ndoshta për këtë mund t’u nevojitet ndihmë nga persona profesionistë.