Author: kopshti im

“Strategjia e rihapjes do të vijojë sipas fazave që komiteti teknik i ekspertëve ka miratuar.  Do të vijojmë me hapjen e çerdheve dhe kopshteve nga data 1 Qershor, protokolli I të cilave është miratuar dhe është shpërndarë për t’u parapërgatitur për këtë datë. Vlerësojmë që ky protokoll por edhe të gjithë protokollet e sigurisë duhet të zbatohen rreptësisht, pasi janë baza për ruajtjen e shëndetit të popullatës”. Deklarata u bë nga Ministrja e Shëndetësisë dhe Mbrojtjes Sociale Ogerta Manastirliu, e cila mori pjesë sot në mbledhjen e Komitetit Teknik të Ekspertëve.

Sipas Ministres së Shëndetësisë, faza e dytë e rihapjes do të vijojë edhe me sezonin turistik, me protokolle sigurie në funksion të mbrojtjes dhe vetëmbrojtjes së qytetarëve, për të kufizuar përhapjen e COVID19.
Ministrja e Shëndetësisë kërkoi vëmendje maksimale nga strukturat e shëndetësisë në këtë situatë të fazës së dytë të rihapjes.
“Nuk duhet të harrojmë që ky virus vijon të qarkullojë dhe ne duhet t’i përgjigjemi me të gjitha strukturat në gatishmëri. Kemi hyrë në javën e 12 të epidemisë me mbi 1 mijë të prekur. Tashmë edhe puna bëhet më e vështirë për të gjurmuar kontaktet, ndaj duhet të intensifikohet puna nga strukturat tona të terrenit“, tha Manastirliu.
Duke paraqitur situatën e deritanishme, drejtuesja e Departamentit të Sëmundjeve Infektive në ISHP dr. Silva Bino kërkoi rritje të ndërgjegjësimit edhe të të rinjve.
“Rritja e numrit të rasteve sidomos në Tiranë tregon se sa të kujdesshëm duhet të jemi. Është koha që të rinjtë të jenë të përgjegjëshëm, që e gjithë popullata të jetë e përgjegjshme në mënyrë që të ruajmë distancën dhe rregullat e higjienës”, tha Bino.

Shefja e Shërbimit Infektiv në QSUT, prof. Najada Çomo deklaroi se situate është e qëndrueshme, por ka raste të rënda në spital dhe kërkoi bashkëpunimin e qytetarëve.
“Duhet të jemi realistë që ka persona të shtruar në spitalin infektiv që janë në gjendje jo të mirë shëndetësore dhe duke patur parasysh që kemi patur dy vdekje brenda pak ditësh tregon për vazhdimin e gravitetit të sëmundjes, pa çka se shifra është nën 20. Por kjo shifër mund të zvogëlohet ose të shtohet në ditët në vijim. Masat e marra dhe pjesa e ruajtjes së distancimit janë elementë shumë të rëndësishëm për të ruajtur shifrat e ulëta të pacientëve të shtruar në shërbimin infektiv”, tha Çomo.
Prof. Tritan Kalo apeloi për vetëndërgjegjësim nga qytetarët. “Sfida me COVID19 ende nuk ka përfunduar ndaj masat e vetëndërgjegjësimit dhe kujdesit ndaj vetes mbeten në fuqi sot, nesër dhe në të ardhmen”, tha Kalo.
Komiteti Teknik i Ekspertëve do të vijojë vlerësimin mbi baza ditore dhe 14 ditore të situatës epidemiologjike të COVID19 për vendimet e mëtejshme.

Ministria e Shëndetësisë dhe Mbrojtjes Sociale ka publikuar udhëzuesin për masat që duhet të ndërmarrin institucionet e kopshteve dhe çerdheve në prag të hapjes, në kuadër të parandalimit të përhapjes së Covid-19. Ministria ka parashikuar hapjen e kopshteve dhe çerdheve më 1 qershor ndërkohë që rregullorja prej 7 faqesh është shpërndarë në të gjitha kopshtet e çerdhet.

Disa nga rregullat

-Kopshtet dhe çerdhet do të hartojnë një grafik për sjelljen e marrjen e fëmijëve në këto institucione. Prindërit duhet ta respektojnë me përpikmëri.

-Në hyrje e në dalje të institucionit do të vendoset një higjienizues për duart në trajtë solucioni me përmbajtje aktive të alkoolit 60%. Ai duhet të jetë gjatë gjithë kohës i pranishëm në mënyrë që fëmijët të pastrojnë duart kur të vijnë dhe kur të ikin.

-Fëmija do të shoqërohet nga një prind i cili do të qëndrojë jashtë ambienteve të institucionit dhe pret në distancë 1/5 metra nga prindërit e tjerë për ta dorëzuar fëmijën tek personeli i çerdhes.

-Fëmija do të pritet dhe shoqërohet nga një edukatore e cila e merr fëmijën në hyrje të kopshtit.

-Në momentin që fëmija hyn në institucion çdo ditë.

-Do i matet temperature me termometër digjital.

-Do i pastrohen duart me solucion higjienizues në momentin që hyn në çerdhe/kopsht.

-Nëse është e mundur të vendosen vaska me solucion dezinfektues me bazë klor për shuajt e këpucëve përpara hyrjes në çerdhe/ kopsht.

-Rekomandohet që fëmija të shoqërohet nga prindi jo gjyshërit.

-Nëse fëmija shfaq temperaturë njoftohet prindi për ta marrë menjëherë.

-Fëmijët e një grupi do të qëdrojnë në të njëjtën sallë cdo ditë dhe me të njëjtën edukatore.

“Duke filluar nga 1 Qershori, në vend do të hapen edhe kopshtet dhe çerdhet. Draft-protokolli i specialistëve të Institutit të Shëndetit Publik përcakton rregulla strikte përsa i përket dorëzimit të fëmijëve si dha masave mbrojtëse për personelin e kopshteve dhe çerdheve”.

“Tv Klan” ka siguruar draft protokollin e specialistëve të  ISHP-së, ku përcaktohet se si do të bëhet hapja e kopshteve dhe çerdheve. Fëmijët nuk do lejohet të dorëzohen dhe merren nga gjyshërit, vetëm nga prindërit. Këta të fundit nuk do mund të hyjnë brenda institucionit, por duhet ta dorëzojnë fëmijën tek edukatorja, në derën e kopshtit apo çerdhes.

Po ashtu në draft është përcaktuar se nuk do lejohen në mënyrë kategorike fëmijët që mund të kenë probleme shëndetësore. Madje edhe të vegjlit që do të futen brenda kopshtit apo çerdhes do t’u matet temperatura dy herë në ditë.

Përsa i përket personeli, ata duhet të jenë të pajisur me doreza dhe maska. Po ashtu edhe kuzhinierët duhet të jenë me masa mbrojtëse.

Në draft thuhet se nuk do të ketë kufizime për numrin e fëmijëve, por do të përdoren të gjitha hapësirat e kopshtit dhe çerdheve për të krijuar distancë mes fëmijëve.

Ministria e Shëndetësisë ka urdhëruar mbylljen e shkollave, kopshteve, dhe çerdheve deri në përfundim të situatës me pandeminë.

Më parë, vendimi për mbylljen e tyre ishte deri më datë 3 prill, por mos përmirësimi i situatës ka detyruar autoritetet që të vendosin shtyrjen e vendimit për rihapjen e tyre pa afat, deri në përfundim të pandemisë.

Të gjitha institucionet arsimore publike dhe jopublike do të mbeten mbyllur deri në 3 prill 2020.  Pas rekomandimit të Komitetit të Ekspertëve, Ministrja e Shëndetësisë dhe Mbrojtjes Sociale Ogerta Manastirliu ka firmosur urdhrin e dytë që shtyn afatin e çeljes së aktivitetit në këto institucione.

“Kemi vendosur mbylljen e institucioneve arsimore duke filluar nga kopshtet por edhe të çerdheve publike dhe jo publike deri në 3 Prill”, u shpreh Manastirliu.

Aktualisht i gjithë vendi është përfshirë  nga masa të rrepta që ka lënë hapur vetëm njësitë e tregtimit të ushqimeve, fasonet dhe call center si dhe disa hallka të tjera të cilësuara si jetike për ekonominë.

Ndëkrohë shkollat, kopshtet, çerdhet, baret-restorantet, qendrat tregatre dhe njësi të tregtimit të artikujve që nuk cilësohen si jetikë mbeten të mbyllur qysh nga java e kaluar duke lënë të paqarë afatin se kur do të kthehet aktiviteti normal. Një masë e tillë u mor nga qeveria me synimin për të parandaluar përhapjen e koronavirus.

Shkolla greke jopublike “Omiros” në qytetin e Korçës, përmes një njoftimi ditën e sotme iu ka bërë të ditur prindërve se një nga mësuesit e këtij stafi ka rezultuar pozitiv me Covid-19.

Në njoftim shkruhet gjithashtu se ky rast është konfirmuar pozitiv ditën e premte (dt.13.02). Kjo shkollë është mbyllur 4 ditë para se të shfaqej rasti me koronavirus.

Njoftimi i plotë:

Të dashur prindër, ju informojmë se një person prej stafit edukativ të Shkollës “Omiros” u gjend pozitiv ndaj koronavirusit ditën e Premte dt 13/03/2020. Shkolla jonë u mbyll ditën e hënë, 4 ditë para se të shfaqej rasti, dhe ishte e vetmja ditë që dikush prej stafit dhe fëmijëve mund të ketë erdhur në kontakt me personin e infektuar i cili nuk ishte në dijeni për problemin deri ditën që iu shfaqën shenjat e para dhe shkoi në spital, ku pas analizave rezultoi pozitiv. Duke pasur parsysh dhe propabilitetin më minimal të një infeksioni të mundshëm, jemi të detyruar t’iu vëmë në dijeni që të jeni më vigjilentë në lidhje me shëndetin tuaj dhe të ndiqni udhëzimet e mëposhtme në rast se keni një prej shenjave të bëra publike e që lidhen me infektimin nga ky virus.
Më poshtë kemi udhëzimet e Organizmit Kombëtar të Shëndetit Publik.

Persona që erdhën në kontakt me një rast të verifikuar apo të dyshimtë të infektimit me koronovirusin e ri ( psh anëtarët e familjes, miqtë, kolegët, profesionistët e shëndetit) ndjekin shëndetin e tyre (matin temperaturën dy herë në ditë) nga dita e kontaktit të fundit me këtë rast që prej 14 ditësh.
Është i domosdoshëm komunikimi i (përditshëm) me profesionistët e shëndetit gjatë gjithë kohës së karantinës.

Përgjatë gjithë kësaj periudhe (14 ditore) duhet të aplikohen rregullat si më poshtë:
Qëndrim në dhomë e cila vazhdimisht pastrohet ajri që përdoret vetëm për këtë person.

• Kufizim i të gjithë atyre që kujdesen për personin, një person i cili i përket grupit të rrezikut (dmth janë të një moshe të madhe dhe nuk ka sëmundje kronike).
• Nuk lejohen vizitat
• Qëndrim i anëtarëve të tjerë të familjes në dhomë tjetër nëse kjo nuk është e mundur të qëndrojnë të paktën në 2 m largësi nga personi.
• Izolim nga lëvizjet e personit në shtëpi, sa të jetë e mundur.
• Ajrosia sa më e mirë e ambienteve të përbashkëta.
• Larje e mirë e duarve para dhe pas kontaktit me njeriun ose ambientn e tij (dhomë, objekte) , para ushqimit dhe pas përdorimit të banjës (larje duarsh me ujë e sapun ose përdorimi i dizifektantit nëse duart e tij janë dukshëm të ndotura ose jo).
• Gjithmonë të mbulhet goja dhe hunda gjatë momentit që kollitet ose tështin.
• Hedhje e kujdesshme e mbeturinave dhe materialeve të përdorura për mbulimin e hundës apo të gojës, larje e kujdesshme në rast se nuk janë për një përdorim.
• Shmangie e kontaktit të drejtpërdrejt me lëngra të trupit, në veçanti pështymë apo të tjera lëngra trupore me duart të pambrojtura dhe përdorimi i dorezave me një përdorim. Pason larja e duarve.
• Shmangia e kontaktit me objekte mundësisht të infektuara të të sëmurit si piata, gota, lugë e pirunj, piceta, çarçafë të cilat pas një larjeje të kujdesshme ripërdoren. Pastrim dhe dizifektim i sipërfaqeve dhe objektve të dhomës së të sëmurit me bazë ditore me një sapun ose detergjent të zakonshëm, shplarje të duarve dhe në vazhdim dizifektim me një tretësirë prej klori shtëpiak në një propocion 1:50, nëse përdoret kolorinë e holluar 5%.
• Larje e banjës çdo ditë me të njejtën mënyrë.

Me respekt të veçantë
Drejtoria e Shkollës Omiros./ Telegraf

Në zbatim të planit të masave të marra për parandalimin e prekjes nga COVID 19, të gjithë çerdhet dhe kopshtet në kryeqytet do të qëndrojnë të mbyllura përkohësisht.

Paralelisht, Bashkia e Tiranës po vijon me ritëm te lartë dezinfektimet në këto institucione parashkollore që të jenë gati për rihapjen e tyre.

“Vendimi për shkollat vlen edhe për kopshtet e çerdhet! Edhe pse fëmijët nuk paraqesin rrezikshmëri, mund të jenë bartës që prekin më pas gjyshërit e tyre që janë me të rrezikuar. Ndërkohë po vijojmë dezinfektimet që të jemi gati kurdo që vendoset rihapja #DoJaDalim”, thekson Veliaj.

Pas situatës së krijuar në vend nga konfirmimi i dy rasteve të para me koronavirus, Task – Forca ka vendosur mbylljen e institucioneve arsimore për një periudhë dy javore, deri më 23 mars 2020.

Lajmi u bë i ditur nga Ministrja e Arsimit, Besa Shahini, në rrjetin e saj social Facebook.

Deklarata e Shahinit:

U vendos nga Task Forca për Koronavirusin që të mbyllen institucionet arsimore për periudhë dy javore, deri më 23 mars 2020.

Kjo për arsye frenimi të përhapjes së virusit COVID-19, i cili është shfaqur në dy raste në Shqipëri. Masa është parandaluese dhe frenuese – nuk ka asnjë nevojë e arsye për panik. Po tregohemi shumë të kujdesshëm që të zvogëlojmë maksimalisht mundësinë e përhapjes së këtij virusi.

Mbani mend që fëmijët dhe të rinjtë nuk janë grupmoshë e rrezikuar nga virusi, por mund të jenë bartës. Ndaj, do të pezullohet mësimi në institucionet arsimore.

Masat që secili prej nesh duhet të ndërmarrë individualisht:
• Të lajmë duart shpesh për 20 sekonda;
• Të evitojmë takimin deri në 1 m largësi;
• Të evitojmë grumbullimet e njerëzve.

Prindërit që kanë fëmijët të regjistruar në kopshte apo çerdhe publike përballen me pagesa të fshehta përveç tarifë zyrtare ditore. Një auditim performance i Kontrollit të Lartë të Shtetit mbi efektivitetin e çerdheve dhe kopshteve është fokusuar në dy bashki, atë të Tiranës dhe Vlorës ku ka nxjerrë edhe konkluzionet. Kështu me shqetësim është parë transparenca e detyrimeve që lidhen me tarifimin e kostot e çdo prindi në çerdhe dhe kopshte.

KLSH parashtron se tarifa për frekuentimin në çerdhe dhe kopshte përcaktohet me Vendim të Këshillit Bashkiak dhe në këtë vendim përcaktohet se kjo tarifë mbulon ushqimin dhe paguhet një herë në muaj në varësi të ditëve që ka frekuentuar çerdhen ose kopshtin.

Nga shqyrtimi i këtij dokumentacioni vihet re se në dy rastet Tiranë dhe Vlorë ky vendim nuk shoqërohet me asnjë studim apo përllogaritje të kostove apo elementë të tjerë të marra në konsideratë për arritjen në këtë tarifë përfundimtare. Audituesit nënvizojnë se ajo çka bie në sy në të dy bashkitë është se tarifa në të dyja rastet është e njëjtë (130 lekë/ditë për çerdhet dhe 160 lekë/ditë për kopshtet) pavarësisht se niveli i të ardhurave në këto dy qytete është i ndryshëm.

Krahas kësaj mungese transparence nga auditimi në kopshte dhe çerdhe rezultoi se gjatë vitit shkollor prindërit përballen me “kosto të fshehura” për pjesën më të madhe të nevojave që ka një shërbim i tillë. Gjatë shqyrtimit të dokumentacionit që administrojnë përgjegjësit e kopshteve dhe çerdheve u vu re se rregullisht në këto institucione mblidhen kontribute nga prindërit të cilët sigurojnë ujin e pijshëm, mjetet didaktike, të përditshme të fëmijës (letra, lapsa, ngjyra, lodra, plastelina, gërshërë e shumë mjete të tjera), pajisje e orendi të tjera si lavatriçe, frigorifer, soba ngohjeje, dhe riparim të tyre, arredim.

Ky fenomen u has më i reduktuar në Bashkinë Vlorë ku për shkak edhe të nivelit të ulët të të ardhurave prindërit siguronin kryesisht mjete didaktike në pamundësi për orendi të tjera ndërkohë që nga dokumentacioni vënë në dispozicion Bashkia vetëm për vitin 2018 kishte shpenzuar mbi një milionë lekë për fishekzjarrë” thuhet në dokumentin e KLSH.

Po kështu shpenzimet sipas audituesve jo në të gjitha rastet janë shoqëruar me fatura ndërkohë që fondet e mbledhura administrohen nga përgjegjësit e kopshtit apo çerdhes dhe në raste të tjera nga bordi i prindërve.

I njëjti auditim nënvizon se ka paqartësi apo mbivendosje sa i takon standardeve apo rregulloreve të aplikueshme në shërbimin e kopshteve dhe çerdheve kjo e lidhur me çështje të mjedisit, sigurisë, ushqimit apo higjienës.

 Në këto kushte KLSH ka rekomanduar që të hartohet një studim i detajuar që do të përcaktojnë një tarifë të saktë për shërbimin duke evituar pagesat e fshehta.

Burimi: Monitor