Author: kopshti im

Ministri i Jashtëm i Gjermanisë njoftoi sot gjatë konferencës së donatorëve se vendi i tij do të japë 11 milionë euro Shqipërisë për rindërtimin pas tërmetit të 26 nëntorit.

Ai u shpreh se mjetet financiare do të vihen në dispozicion nga Ministria Federale për Bashkëpunim Ekonomik dhe Zhvillim.

Ato do t’i shërbejnë rindërtimit dhe mirëmbajtjes së shkollave, kopshteve dhe institucioneve arsimore.

“Tërmeti i rëndë i nëntorit, që goditi Shqipërinë, mori 51 jetë njerëzish dhe shkaktoi dëme serioze. Gjermania ofroi menjëherë ndihmën e saj nëpërmjet ekspertëve të Agjencisë të Asistencës Teknike. Por tani bëhet fjalë për rindërtimin. Qytetarët në zonat e prekura kanë nevojë për banesa, shkolla dhe kopshte. Gjermania vë në dispozicion për këtë 11 milionë euro. Është një dëshmi e fortë e solidaritetit të BE-së me Shqipërinë fakti që Komisioni Evropian po koordinon asistencën ndërkombëtare të emergjencës dhe ka thirrur për këtë qëllim konferencën e sotme të donatorëve”, tha ministri.

Rotaviruset janë një nga shkaqet më të shpeshta të sëmundjes së rëndë të diarresë tek fëmijët e vegjël. Sipas Organizatës Botërore të Shëndetësisë, në vitin 2013 rreth 215 000 fëmijë nën moshën 5 vjeç ndërruan jetë brenda një viti si pasojë e infeksioneve të rotavirusit. Pjesa më e madhe e këtyre fëmijëve jetonin në vende me zhvillim të ulët ekonomik.

4 vaksinat rotavirus konsiderohen si mjaft efikase në parandalimin e sëmundjet së rëndë gastrointestinale. OBSH rekomandon që vaksinat rotavirus të përfshihen në të gjitha programet kombëtare të imunizimit. OBSH vazhdon të rekomandojë që doza e parë e vaksinës së rotavirusit duhet të jepet pas 6 javëve të para të lindjes, së bashku me vaksinën DTP.

Në vendin tonë vaksina e re e rotavirusit është shtuar këtë muaj në kalendarin e vaksinimit, duke përafruar kalendarin tonë të vaksinimit me kalendarin europian.

Në shumicën e vendeve ku është aplikuar vaksina ndaj rotavirusit janë ulur në mënyrë dramatike shtrimet në spital dhe vizitat urgjente të fëmijëve. Vaksinimi me këtë vaksinë është falas si pjesë e programit kombëtar të vaksinimit dhe ka filluar në datën 1 tetor 2019, për të gjithë fëmijët e lindur që nga data 1 gusht 2019.

Rotavirusi mund të shkaktojë diarre të rëndë, të vjella, ethe dhe dhimbje barku. Disa fëmijë me sëmundje rotavirusi humbasin shumë lëngje dhe bëhen shumë të dehidratuar. Një fëmijë mund të marrë rotavirusin aksidentalisht nga një fëmijë tjetër që ka rotavirus. Kjo mund të ndodhë nëse një fëmijë vendos në gojë duart e palara ose një objekt, ushqim ose lëngje të kontaminuara. Me futjen e vaksinës së re, kalendari I vaksinimit ka 12 vaksina të detyrueshme për fëmijët.

Lundrimi në internet i të miturve përbën rrezik për të rënë pre e ngacmimeve online. Në vitin 2018, kompanitë e teknologjisë në botë raportuan mbi 45 milionë foto dhe video në internet të fëmijëve të abuzuar seksualisht, dyfish i numrit se një viti më parë. Edhe në Shqipëri sipas një raporti të UNICEF, 1 në 10 fëmijë janë ngacmuar seksualisht online.

“Prej shumë kohësh tashmë është bërë problem abuzimi seksual online dhe ky problem ka ardhur duke u rritur. Edhe në vendin tonë qarkullojnë imazhe të abuzimit seksual me fëmijët. Në vitin 2018 një organizatë italiane publikoi se domeni “.al” është i treti në Europë për nga përmbajtja e imazheve, apo videove me abuzim seksual të fëmijëve, pra i treti në Europë dhe i 8 në botë. Pra ka edhe në internetin shqiptar me përmbajtje të tilla që qarkullojnë, ku dikush i ka shantazhuar për të dërguar një foto intime të fëmijëve”, thotë Ina Verzivolli, specialiste e mbrojtjes së fëmijëve, Unicef Albania.

Në një interviste për TV Klan, zv/ministrja e Brendshme, Romina Kuko thotë se edhe në vendin tonë është zbuluar një rrjet i abuzuesve online. “Kemi informacione që ngacmuesit online kanë komunikim me njëri-tjetrin dhe shkëmbejnë informacione me njëri-tjetrin ne dimë një pjesë të abuzuesve online. Ne kemi identifikuar që navigimi online ndodh pa identifikim, një person hyn në një rrjet wireless pa u identifikuar dhe aty mund të kryejë aktivitet ët paligjshëm dhe mund të jetë abuzues potencial në hapësirat tona.”

Por tashmë abuzuesit online do të identifikohen “Jemi duke zbatuar një projekt për identifikimin e të gjithë abuzuesve online. Pra nëse sot ka patur hapësira ku abuzuesit kanë patur mundësi që të navigojnë në internet pa u identifikuar plotësisht, kanë patur mundësi që t’i afrohen të miturve pa patur një kontroll të fortë dhe një barrierë të fortë, ne sot po bëjmë të mundur që çdo abuzues online të identifikohet, të gjurmohet dhe të hetohet. Së bashku me kompanitë e internetit do kërkojmë që kushdo që hyn në rrjet dhe internet të ketë një identifikim, emër, numër telefoni, adresë e-maili dhe kjo ndihmon në gjurmueshmërinë. Ka shumë mundësi për ta fshehur IP dhe nuk identifikohesh këtu ku je dhe ta transferosh identitetin tënd në një vend tjetër, por tashëm është e gjurmueshme.”

Sipas ekspertëve të krimit kibernetik dhe atyre që merren me fëmijët, ajo që mbetet shqetësim është numri i ulët i denoncimeve për këtë vepër penale.

Nga Lira Gjika

• Kur je i nxehur mos e prek fëmijën me dorë sidomos kur je në rrugë. Nervozizmi është një energji që ti vetë nuk arrin ta kontrollosh. Ti reagon në mënyrë të dhunshme jo nga veprimi i fëmijës, por për shkak të situatës së turbullt emocionale brënda teje.
•  Fol me fëmijën pasi të jesh qetësuar dhe ke mundësi të kontrollosh nervozizmin.
• Kur bën një veprim të keq ndaj fëmijës, kur qetësohesh, të paktën kërkoi të falur.
• Edukimi nuk ndodh kur i rrituri urdhëron. Kjo mënyrë krijon vetëm frikë dhe përsërit të njëjtën mënyrë të sjelluri.
• Edukimi nuk mund të realizohet kur të rriturit janë nervoz dhe urdhërues.
• Kur flisni me fëmijën, uluni në gjunjë që të barazoheni me të dhe të mos flisni në pozicion nga lart- poshtë. 
• Kur flisni me fëmijën mos e shkundi apo kapni për krahu apo veshi, janë veprime që gjymtojnë.
• Kur flisni me fëmijën, flisni me drejtshkrim. Dialekti duhet përdorur pasi është dhënë këshilla më parë me drejtshkrim. Fëmija duhet ta njohë edhe dialektin.
• Mos e gënjeni fëmijën as për arsye madhore. Përpiquni t’ia thoni të vërtetën fëmijës, sa më kuptueshëm edhe kur është një vjeç.
• Ëmbëlsoni zërin kur flisni me fëmijën.
• Nuk mund të ketë edukim të mirë me dhunë, gënjeshtra, dhe të folur jo të zgjedhur.